നടനെന്ന് ഒരു നിമിഷം മറന്നു; തിയേറ്ററിൽ വിജയ്‌യുടെ ജനനായകൻ കണ്ട് വിസിലടിച്ച് രവി മോഹൻ | സിനിമാ വാർത്ത

രവി മോഹൻ തിയേറ്ററിലെത്തുന്നതിന്റെ ദൃശ്യങ്ങൾ ഉൾപ്പെടെയുള്ള വീഡിയോകൾ സാമൂഹിക മാധ്യമങ്ങളിൽ പ്രചരിച്ചു. തുടർന്ന് തിയേറ്ററിനുള്ളിൽ നിന്നുള്ള മറ്റൊരു വീഡിയോയും പുറത്തുവന്നു. ചിത്രത്തിൽ വിജയ് സ്‌ക്രീനിലെത്തുന്ന രംഗത്തിനിടെ രവി മോഹൻ ആവേശത്തോടെ ആർപ്പുവിളിക്കുകയും കൈയടിക്കുകയും വിസിൽ മുഴക്കുകയും ചെയ്യുന്നതായി ദൃശ്യങ്ങളിൽ കാണാം.

‘ദ പാപ്സ്റ്റർ സൗത്ത്’ എന്ന ഇൻസ്റ്റഗ്രാം പേജിൽ പങ്കുവെച്ച വീഡിയോയിൽ, തിയേറ്ററിലെ അവസാന നിരയിൽ ഇരുന്ന് മറ്റ് ആരാധകർക്കൊപ്പം ‘ജനനായകൻ’ ആസ്വദിക്കുന്ന രവി മോഹനെ കാണാം. ബിഗ് സ്ക്രീനിൽ വിജയ് പ്രത്യക്ഷപ്പെട്ട നിമിഷം തന്നെ ആവേശഭരിതനായ രവി മോഹൻ ആർപ്പുവിളിക്കുകയും കൈയടിക്കുകയും ചെയ്തു. വിജയ്‌യുടെ അവസാന ചിത്രത്തിന്റെ ആഘോഷത്തിൽ പങ്കുചേരുന്നതിനിടെ അദ്ദേഹം വിസിൽ മുഴക്കുന്നതും ദൃശ്യങ്ങളിൽ കാണാം.

ഒരു സാധാരണ ആരാധകനെപ്പോലെ രവി മോഹൻ പ്രകടിപ്പിച്ച ഈ ആവേശം സമൂഹമാധ്യമങ്ങളിൽ ഏറെ ശ്രദ്ധ നേടി. താരത്തിന്റെ പ്രതികരണം ആരാധകർക്കിടയിൽ വലിയ പ്രശംസയ്ക്കും ഇടയാക്കി.

വൻ ആഘോഷങ്ങളോടെയാണ് ‘ജനനായകൻ’ തിയേറ്ററുകളിൽ പ്രദർശനം ആരംഭിച്ചത്. ചിത്രത്തിന്റെ റിലീസിനെ തുടർന്നുള്ള ആവേശം വർധിപ്പിക്കുന്നതിൽ പുറത്തുവന്ന വീഡിയോകളും നിർണായകമായി. ദക്ഷിണേന്ത്യയിലുടനീളം വിജയ്‌യുടെ അവസാന ബിഗ് സ്ക്രീൻ ചിത്രത്തിന് ആരാധകർ ഉത്സവാന്തരീക്ഷത്തിലാണ് വരവേൽപ്പ് നൽകുന്നത്. തിയേറ്ററുകളിൽ ആരാധകർ നൃത്തം ചെയ്യുന്നതും പ്രിയതാരത്തിന്റെ അഭിനയയാത്രയ്ക്ക് വികാരനിർഭരമായ വിടവാങ്ങൽ നൽകുന്നതുമായ ദൃശ്യങ്ങൾ വ്യാപകമായി പ്രചരിക്കുകയാണ്.

എച്ച്. വിനോദ് സംവിധാനം ചെയ്യുന്ന ‘ജന നായകൻ’ ചിത്രത്തിലെ പ്രധാന റോളുകളിൽ ബോബി ഡിയോൾ, പൂജാ ഹെഡ്ഗെ, മമിതാ ബൈജു, പ്രകാശ് രാജ്, ഗൗതം വാസുദേവ് മേനോൻ, നരേൻ, പ്രിയാമണി തുടങ്ങി വമ്പൻ താരനിരയാണ് ചിത്രത്തിലുള്ളത്. കലാ മൂല്യമുള്ളതും നിലവാരമുള്ളതുമായ സിനിമകൾ നിർമിച്ച വെങ്കട്ട് കെ. നാരായണ ആണ് കെ.വി.എൻ. പ്രൊഡക്ഷന്റെ പേരിൽ ‘ജന നായകൻ’ നിർമിച്ചിരിക്കുന്നത്.

Summary: The visuals of actor Ravi Mohan arriving at Chennai’s Vetri Theatre to watch Vijay’s final film ‘Jana Nayagan’ have gone viral. The film, which was originally scheduled for release in January, reached theatres only on July 23 after delays caused by issues related to censor certification. After a long wait, Ravi Mohan visited the theatre to watch Vijay’s final big-screen film along with the fans