Last Updated:
നടി മഞ്ജു വാര്യർ ഒരു റാക്കറ്റിന്റെ തടവിലെന്ന ആരോപണവുമായി ചലച്ചിത്ര സംവിധായകാൻ സനൽകുമാർ ശശിധരൻ തിരുവനന്തപുരം സെക്രെട്ടറിയറ്റിന് മുന്നിൽ സമരത്തിലാണ്
നടി മഞ്ജു വാര്യർ (Manju Warriar) ഒരു റാക്കറ്റിന്റെ തടവിലെന്ന ആരോപണവുമായി ചലച്ചിത്ര സംവിധായകാൻ സനൽകുമാർ ശശിധരൻ തിരുവനന്തപുരം സെക്രെട്ടറിയറ്റിന് മുന്നിൽ സമരത്തിലാണ്. ഏറെക്കാലമായി താനും മഞ്ജുവും തമ്മിൽ അടുപ്പത്തിലെന്ന നിലയിൽ സനൽ കുമാർ ശശിധരൻ ചില ഫേസ്ബുക്ക് പോസ്റ്റുകളുമായി രംഗത്തു വന്നിരുന്നു. അടുത്തിടെ മഞ്ജു വാര്യരുമായുള്ള സംഭാഷണമെന്ന പേരിൽ ഒരു ഓഡിയോ ചാറ്റും ഇദ്ദേഹം പുറത്തുവിട്ടു.
ഇതേസമയം, മഞ്ജു തടവിലെന്ന ആരോപണത്തിന് സഹോദരൻ മധു വാര്യർ ഫേസ്ബുക്ക് പോസ്റ്റിലൂടെ നർമം കലർത്തിയ പ്രതികരണവുമായി രംഗത്തുണ്ട്. ഇതിൽ മധുവും ഭാര്യയും മകളും അമ്മയും മഞ്ജുവിന്റെ ഒപ്പമുള്ള ഒരു ചിത്രവുമുണ്ട്. പോസ്റ്റിലെ വാചകങ്ങൾ ചുവടെ:
അമ്മയും അനുവും ആവണിയും ഞാനും കൂടെ തടവിൽ കഴിയുന്ന മഞ്ജുവിനെ പോയി കാണാൻ തീരുമാനിച്ചു. മഞ്ജുവിനെ തടവിൽ പാർപ്പിച്ചിട്ടുള്ള കാലമാടന്മാർ എങ്ങാനും ആക്രമിച്ചാലോ എന്ന് പേടിച്ച്, അവരെ കടിച്ചു കുടയാൻ ഒന്നരയടി കഷ്ടിയുള്ള കൊക്കോയെ കൂടെ കൂട്ടി. അവിടെ ചെന്നപ്പോൾ തോക്കിൻമുനയിൽ ഇരിക്കുന്ന മഞ്ജുവിനെ കണ്ട് അമ്മ ഞെട്ടി, അനു ഞെട്ടി, ആവണി ഞെട്ടി, ഞാൻ ഞെട്ടി, ബാൽക്കണിയിൽ ഇരിക്കുന്ന പ്രാവിലേക്ക് ശ്രദ്ധ പോയത് കൊണ്ട് ഒരു പത്ത് സെക്കന്റ് ഡിലേ കഴിഞ്ഞ് കൊക്കോയും ഞെട്ടൽ രേഖപ്പെടുത്തി. അങ്ങനെ ഞെട്ടൽ മഹാമഹം കഴിഞ്ഞു എന്നുറപ്പ് വരുത്തിയതിന് ശേഷം ഞങ്ങൾ ബാക്കി കാര്യപരിപാടിയിലേക്ക് കടന്നു.
മഞ്ജു പുതിയതായി വാങ്ങിയ ഡ്രെസ്സുകൾ എടുത്ത് കൊണ്ട് വന്ന് നിരത്തി അതിന്റെ ഡിസ്കഷൻസിലേക്ക് കടന്നു. തടവിൽ ഇരിക്കുമ്പോഴെങ്കിലും മഞ്ജുവിന്റെ വാചകമടിക്ക് കുറവുണ്ടാകുമെന്ന് കരുതിയെങ്കിലും അത് തെറ്റാണെന്ന് പെട്ടെന്ന് തന്നെ മനസ്സിലായി. അത് കഴിഞ്ഞ് ഗൺപോയിന്റിലുള്ള മഞ്ജു എല്ലാവർക്കും ബേൺഡ് ഗാർലിക് ഫ്രൈഡ് റൈസും, നൂഡിൽസും, ഹണി ഗ്ലേസ്ഡ് ചിക്കനും, സാൾട്ട് പെപ്പർ കോട്ടേജ് ചീസും ഓർഡർ ചെയ്തു.
ഭക്ഷണശേഷം ഇറങ്ങാൻ നേരം രണ്ട് ദിവസം കഴിഞ്ഞേ വരുന്നുള്ളൂ എന്ന് അമ്മ പറഞ്ഞു. കഥകളി ക്ലാസ്സിന്റേയും യോഗാ ക്ലാസ്സിന്റേയും ബോറടി മാറ്റാൻ രണ്ട് ദിവസം മഞ്ജുവിന്റെ കൂടെ തടവിൽ കഴിയാൻ പോകുകയാണ് പോലും. അപ്പൊ ഇനിയുള്ള രണ്ട് ദിവസം അമ്മയും തോക്കിൻമുനയിലായിരിക്കും.
Summary: Manju Warrier’s brother Madhu Warrier has responded to the allegation that she is being confined, using humour in a Facebook post. The post also features a photograph of Madhu, his wife and daughter, and his mother with Manju
