International
oi-Jithin TP
മിയാമി അന്താരാഷ്ട്ര വിമാനത്താവളത്തില് കാര്ഗോ വിമാനം റണ്വേയില് നിന്ന് തെന്നിമാറി തകര്ന്നുവീണ് അഞ്ച് പേര് മരിച്ചു. ഞായറാഴ്ചയാണ് സംഭവം. 21 എയര് പ്രവര്ത്തിപ്പിക്കുന്ന ആമസോണ് പ്രൈം എയര് കാര്ഗോ വിമാനമാണ് അപകടത്തില്പ്പെട്ടത്. പ്രൈം എയര് ഫ്ലൈറ്റ് 7598 ആയി സര്വീസ് നടത്തിയിരുന്ന ബോയിംഗ് 767-300 വിമാനം പ്യൂര്ട്ടോ റിക്കോയിലെ സാന് ജുവാനില് നിന്നാണ് എത്തിയത്.
പ്രാദേശിക സമയം ഉച്ചയ്ക്ക് 2 മണിയോടെ വിമാനത്താവളത്തിലെ ഡയഗണല് റണ്വേയില് നിന്ന് തെന്നിമാറിയ വിമാനം നിരവധി വാഹനങ്ങളില് ഇടിക്കുകയും തീപിടിക്കുകയും ചെയ്തു. ഇതോടെ കട്ടിയുള്ള പുക അന്തരീക്ഷത്തില് ഉയര്ന്നു. അപകടത്തെത്തുടര്ന്ന് വിമാനത്താവളത്തിലെ എല്ലാ റണ്വേകളും ടാക്സിവേകളും അടച്ചിടുകയും വിമാനങ്ങളുടെ നീക്കം താല്ക്കാലികമായി നിര്ത്തിവെക്കുകയും ചെയ്തു.
അപകടസ്ഥലത്ത് തീ അണയ്ക്കാനും ബാധിക്കപ്പെട്ടവരെ പരിശോധിക്കാനും മിയാമി-ഡേഡ് ഫയര് റെസ്ക്യൂ വിഭാഗത്തിന്റെ 60-ലധികം യൂണിറ്റുകള് എത്തിച്ചേര്ന്നു. അപകടത്തെക്കുറിച്ച് അന്വേഷിക്കുമെന്ന് ഫെഡറല് ഏവിയേഷന് അഡ്മിനിസ്ട്രേഷന് അറിയിച്ചു. നാഷണല് ട്രാന്സ്പോര്ട്ടേഷന് സേഫ്റ്റി ബോര്ഡും ഇതുസംബന്ധിച്ച വിവരങ്ങള് ശേഖരിക്കുന്നുണ്ട്.
മിയാമി അന്താരാഷ്ട്ര വിമാനത്താവളത്തില് ഇറങ്ങാന് ശ്രമിക്കുന്നതിനിടെ 21 എയര് പ്രവര്ത്തിപ്പിക്കുന്ന ആമസോണ് എയര് വിമാനം അപകടത്തില്പ്പെട്ടതായി ആമസോണ് വക്താവ് കെല്ലി നാന്റല് സ്ഥിരീകരിച്ചു.
‘ഇതൊരു അതിവേഗം മാറിക്കൊണ്ടിരിക്കുന്ന സാഹചര്യമാണ്, ഞങ്ങള് ഇപ്പോഴും വിവരങ്ങള് ശേഖരിച്ചുകൊണ്ടിരിക്കുകയാണ്,’ എന്ന് നാന്റല് പറഞ്ഞു. എന്താണ് സംഭവിച്ചതെന്ന് വ്യക്തമാക്കാന് പ്രാദേശിക അധികൃതരുമായും ഉദ്യോഗസ്ഥരുമായും ചേര്ന്ന് ആമസോണ് പ്രവര്ത്തിക്കുന്നുണ്ടെന്നും അദ്ദേഹം കൂട്ടിച്ചേര്ത്തു.