സ്വർണം വില 20,000 രൂപ വരെ ഇടിഞ്ഞെങ്കിലും ഇനി 16,000 രൂപ വരെ കൂടും: ഈ വർഷം തന്നെ 1.29 ലക്ഷത്തിലേക്ക്?|Gold Rate Fell by Up to Rs 20,000, But Could Rise by Rs 16,000: Will It Reach Rs 1.29 Lakh This Year?

Kerala

oi-Rakhi

Published: Thursday, September 10, 2026, 9:01 [IST]

പശ്ചിമേഷ്യൻ സംഘർഷം ക്രൂഡ് വില ഉയർത്തുന്നതും പണപ്പെരുപ്പ ആശങ്ക വർധിച്ചതും സ്വർണത്തിന് വലിയ തിരിച്ചടിയായി മാറിയിരിക്കുകയാണ്. പണപ്പെരുപ്പത്തെ പിടിച്ചുകെട്ടാൻ യു.എസ് കേന്ദ്രബാങ്കായ ഫെഡറൽ റിസർവ്വ് പലിശ നിരക്ക് ഉയർത്താനുള്ള സാധ്യതയാണ് ഇപ്പോൾ നിക്ഷേപകരെ പ്രതിസന്ധിയിലാകുന്നത്. ഇതോടെ ആഗോള വിപണിയിൽ സ്വർണ വില വീണ്ടും താഴേക്ക് പോയി. രാജ്യാന്തര വിപണിയിൽ നിലവിൽ ഔണ്‍സിന് 4377 ഡോളറിലാണ് വ്യാപാരം നടക്കുന്നത്. അതേസമയം ഇനി സ്വർണത്തിൻ്റെ പോക്ക് എങ്ങോട്ടാണ് എന്നതാണ് പ്രധാന ചോദ്യം.

ഒരു ഇടവേളയ്ക്ക് ശേഷം ഇറാനും യുഎസും തമ്മിലുള്ള സംഘർഷം രൂക്ഷമാകുകയാണ്. കഴിഞ്ഞ ദിവസം യുഎസ് എണ്ണ കപ്പൽ ആക്രമണത്തിന് പകരമായി അഞ്ച് ഇറാനിയൻ എണ്ണക്കപ്പലുകൾ യുഎസ് സൈന്യം ആക്രമിച്ചിരുന്നു. ഇതിന് മറുപടിയായി ജോർദാനിലെ യുഎസ് സൈനിക ക്യാംപിന് നേരെ ഇറാൻ ആക്രമണം നടത്തി. ഇനിയും ശക്തമായി തിരിച്ചടിക്കുമെന്നാണ് ഇറാൻ നൽകിയിരിക്കുന്ന മുന്നറിയിപ്പ്.

അതേസമയം ഹോർമുസിൽ എണ്ണ വിതരണം തടസപ്പെടുന്നത് വീണ്ടും ക്രൂഡ് വിലയെ മുകളിലേക്ക് നയിക്കുകയാണ്. വില ബാരലിന് വീണ്ടും 100 ഡോളറിന് മുകളിലേക്ക് നീങ്ങുകയാണ്. ഡോളർ വില ഉയരുന്നത് പണപ്പെരുപ്പ ഭീതിശക്തമാക്കും.

അമേരിക്കയിൽ പണപ്പെരുപ്പം ശക്തമാണെന്ന സൂചനയാണ് അടുത്തിടെ യുഎസ് ഫെഡ് ഗവർണർ കെവിൻ വാർഷ് നൽകിയത്. ഇതോടെ യു.എസ് ഫെഡ് പലിശ നിരക്ക് ഉയർത്താനുള്ള സാധ്യതകൾ ശക്തമാണെന്ന വിലയിരുത്തലുകൾ ഉണ്ടായിരുന്നു. വീണ്ടും സംഘർഷം ശക്തമായത് ഇത്തരം വിലയിരുത്തലുകൾക്ക് ശക്തിപകരുകയാണ്. അടുത്ത ദിവസങ്ങളിൽ പുറത്തുവരാനിരിക്കുന്ന യു എസ് തൊഴിൽ കണക്കുകളും ഫെഡ് റിസർവ്വിൻ്റെ പലിശ തീരുമാനങ്ങളുമായിരിക്കും ഇനി സ്വർണ വിലയെ സ്വാധീനിക്കുക.

ആഗോള വിപണിയിൽ ഈ വർഷം തുടക്കത്തിൽ സ്വർണ വില ഔണ്‍സിന് 5500 ഡോളറിന് മുകളിൽ എത്തിയിരുന്നു. എന്നാൽ പശ്ചിമേഷ്യൻ സംഘർഷത്തെ തുടർന്ന് വില കുത്തനെ ഇടിഞ്ഞു. ഫെബ്രുവരി മുതൽ ഇതുവരെ ഏകദേശം 20 ശതമാനത്തിൻ്റെ ഇടിവാണ് വിലയിൽ ഉണ്ടായത്. നിലവിൽ 4300 ഡോളറിന് അടുത്താണ് ഔണ്‍സ് വില.

അതേസമയം പ്രതിസന്ധി അകന്നാൽ സ്വർണം ഈ വർഷം തന്നെ കുതിക്കുമെന്നാണ് വിദഗ്ധർ പറയുന്നത്. 4400 ഡോളറിന് മുകളിലേക്ക് വില ഉയരുകയാണെങ്കിൽ ഡിസംബറിന് മുൻപ് തന്നെ 4984 ഡോളറിലേക്ക് വരെ സ്വർണ വില ഉയരുമെന്നാണ് പ്രവചനങ്ങൾ.

ആഗോള സ്വർണ വിപണിയിലെ വിലയിടിവിൻ്റെ ചുവടുപിടിച്ച് കേരളത്തിലും സ്വർണ വില താഴേക്കിറങ്ങുകയാണ്. ഇന്നലെ 22 കാരറ്റ് ഒരു ഗ്രാമിന് 14,145 രൂപയാണ് വില. ഇതോടെ പവൻ വില 1,13,160 രൂപയായി. അതേസമയം 4900 ഡോളറിലേക്ക് ഔണ്‍സ് വില ഉയർന്നാൽ സ്വർണ വില പവന് 1.29 ലക്ഷം വരെയെങ്കിലും ആകും. ഇതായത് ഇപ്പോഴത്തെ വിലയിൽ നിന്നും ഏകദേശം 16,000 രൂപ വരെ ഉയരും. ഇത് പവൻ വില മാത്രമാണ്. ഇതിനൊപ്പം ജി എസ് ടിയും പണിക്കൂലിയുമെല്ലാം നൽകുമ്പോൾ 1.40 ലക്ഷത്തിന് അടുത്തായിരിക്കും വില.