India
oi-Jithin TP
2020 ജനുവരി 21-ന് പുറത്തിറക്കിയ സോവറിന് ഗോള്ഡ് ബോണ്ട് 2019-20 സീരീസ്-VIII കാലാവധിയെത്തുന്നതിന് മുമ്പ് തിരിച്ചെടുക്കാനുള്ള അടുത്ത തീയതി പ്രഖ്യാപിച്ച് റിസര്വ് ബാങ്ക്. 2019-20 ല് ഇഷ്യൂ ചെയ്ത സീരീസിലെ ബോണ്ടുകള് ജൂലൈ 21 മുതല് തിരിച്ചെടുക്കാന് അവസരമുണ്ടാകും. ബോണ്ടുകള് പുറത്തിറക്കിയ തീയതി മുതല് അഞ്ച് വര്ഷം പൂര്ത്തിയായ ശേഷം, പലിശ നല്കേണ്ട ദിവസങ്ങളിലായിരിക്കും എസ്ജിബി സീരീസ് കാലാവധിക്ക് മുന്പേ തിരിച്ചെടുക്കാന് അനുവദിക്കുക.
സ്വര്ണ ബോണ്ടുകളുടെ സാധാരണ കാലാവധി എട്ട് വര്ഷമാണെങ്കിലും ഇഷ്യൂ ചെയ്ത് അഞ്ച് വര്ഷം പൂര്ത്തിയാക്കിയാല് കാലാവധി എത്താതെ പിന്വലിക്കാനുള്ള സൗകര്യമുണ്ട്. ഇന്ത്യ ബുള്ളിയന് ആന്ഡ് ജ്വല്ലേഴ്സ് അസോസിയേഷന് പ്രസിദ്ധീകരിക്കുന്ന 999 ശുദ്ധതയുള്ള സ്വര്ണ്ണത്തിന്റെ കഴിഞ്ഞ മൂന്ന് പ്രവൃത്തിദിവസങ്ങളിലെ ക്ലോസിംഗ് വിലകളുടെ ലളിതമായ ശരാശരി അടിസ്ഥാനമാക്കിയാണ് തിരിച്ചടയ്ക്കല് മൂല്യം കണക്കാക്കുന്നത്.
2026 ജൂലൈ 21-ന് അതായത് ഇന്നത്തെ നിലവാരത്തില് ബാധകമാകുന്നത്, ജൂലൈ 16, 17, 20 തീയതികളിലെ സ്വര്ണത്തിന്റെ ക്ലോസിംഗ് വിലയുടെ ശരാശരിയായിരിക്കും. ഇത് അടിസ്ഥാനമാക്കി ഒരു എസ്ജിബി യൂണിറ്റിന് 14,170 രൂപയായി വില നിശ്ചയിച്ചിട്ടുണ്ട്. എസ്ജിബി 2019-20 സീരീസ്-VIIIലെ ഓണ്ലൈന് ബോണ്ടുകള് ഗ്രാമിന് 3,966 രൂപ നിരക്കിലാണ് പുറത്തിറക്കിയത്. കാലാവധിക്ക് മുന്പുള്ള തിരിച്ചടയ്ക്കല് തീയതിയില് ഇതില് നിന്ന് ഏകദേശം 257% വരുമാനം ലഭിക്കും.
പലിശ കണക്കിലെടുക്കാതെ നോക്കുമ്പോള്, ഈ വരുമാനം 14170 രൂപയില് നിന്ന് 3966 രൂപ കിഴിച്ച് 10204 രൂപ എന്ന നിലയിലാണ് വരുന്നത്. ശതമാനക്കണക്കില് 257.29% സമ്പൂര്ണ വരുമാനത്തിന് തുല്യമാണിത്. അതായത് പലിശ ഒഴികെ 10204 രൂപയുടെ, വരുമാനം ഈ നിക്ഷേപം നല്കിയിട്ടുണ്ട്. ഒരേ സീരീസിലുള്ള എസ്ജിബികള് ഓഫ്ലൈനായി വാങ്ങിയ നിക്ഷേപകര്ക്ക് ഒരു ഗ്രാം സ്വര്ണത്തിന് 4,016 രൂപയായിരുന്നു ഇഷ്യൂ വില.
ഓണ്ലൈനായി എസ്ജിബി വാങ്ങുന്നവര്ക്ക് 50 രൂപയുടെ കിഴിവ് ലഭിച്ചിരുന്നു. 2020-ല് ഈ എസ്ജിബി സീരീസ് പുറത്തിറക്കിയ സമയത്ത് ഒരു ലക്ഷം രൂപ നിക്ഷേപിച്ചവര്ക്ക് കാലാവധി പൂര്ത്തിയാകുന്നതിന് മുന്പ് തിരിച്ചെടുക്കുമ്പോള് ലഭിക്കുന്നത് ഏകദേശം 3.57 ലക്ഷം രൂപയാണ്. സര്ക്കാര് നല്കുന്ന 2.5% വാര്ഷിക പലിശ ഇതില് ഉള്പ്പെടുന്നില്ല. യഥാര്ത്ഥ ഇഷ്യൂ സമയത്ത് വാങ്ങുകയും കാലാവധി പൂര്ത്തിയാകുന്നത് വരെ കൈവശം വെക്കുകയും ചെയ്തവയ്ക്ക് നികുതിയുണ്ടായിരിക്കില്ല.
യഥാര്ത്ഥ ഇഷ്യൂ സമയത്ത് വാങ്ങിയിട്ടില്ലെങ്കിലും കാലാവധി പൂര്ത്തിയാകുന്നത് വരെ കൈവശം വെച്ചവയ്ക്കും ഇഷ്യൂ സമയത്ത് വാങ്ങിയെങ്കിലും കാലാവധി പൂര്ത്തിയാകുന്നത് വരെ കൈവശം വെക്കാത്തവയ്ക്കും നികുതി ബാധകമാണ്. കാലാവധി പൂര്ത്തിയാകുമ്പോള് എസ്ജിബികള് തിരികെ നല്കുമ്പോഴുള്ള നികുതി ഇളവ്, കേന്ദ്ര സര്ക്കാര് ആദ്യമായി പുറത്തിറക്കിയ സമയത്ത് തന്നെ ബോണ്ടുകള് നേടിയവര്ക്ക് മാത്രമേ തുടര്ന്നും ലഭിക്കുകയുള്ളൂ.
സ്വര്ണത്തിന്റെ അളവ് അടിസ്ഥാനമാക്കി നിശ്ചയിച്ചിട്ടുള്ള സര്ക്കാര് സെക്യൂരിറ്റികളാണ് എസ്ജിബികള്. ഭൗതിക രൂപത്തിലുള്ള സ്വര്ണം സൂക്ഷിക്കുന്നതിന് പകരമായി ഇവ ഉപയോഗിക്കാം. നിക്ഷേപകര് ബോണ്ടിന്റെ വില പണമായി നല്കണം. കാലാവധി പൂര്ത്തിയാകുമ്പോള് ബോണ്ടിന്റെ മൂല്യം പണമായി തന്നെ തിരികെ ലഭിക്കുകയും ചെയ്യുന്നു. കേന്ദ്ര സര്ക്കാരിന് വേണ്ടി റിസര്വ് ബാങ്ക് ആണ് ഈ ബോണ്ടുകള് പുറത്തിറക്കുന്നത്.
മിക്ക ബോണ്ടുകളിലും പ്രാരംഭ നിക്ഷേപത്തുകയുടെ മേല് പ്രതിവര്ഷം 2.50% എന്ന നിരക്കിലാണ് പലിശ ലഭിക്കുന്നത്. നിക്ഷേപകന്റെ ബാങ്ക് അക്കൗണ്ടിലേക്ക് ഓരോ ആറു മാസത്തിലും പലിശ തുക നിക്ഷേപിക്കുന്നു. കാലാവധി പൂര്ത്തിയാകുമ്പോള് അവസാന ഗഡു പലിശയും മുതലും ചേര്ത്ത് നല്കുന്നു. 2015-16 സാമ്പത്തിക വര്ഷത്തില് പുറത്തിറക്കിയ എസ്ജിബികള്ക്ക് 2.75% പലിശ നിരക്കാണ് ലഭിച്ചിരുന്നത്. എന്നാല് പിന്നീട് ഇത് 2.50% പലിശ നിരക്കിലാണ് നല്കിയത്.