Jobs
oi-Jithin TP
എസ്ബിഐ ബാക്ക്ലോഗ് ഒഴിവുകള് നികത്തുന്നതിനുള്ള പ്രത്യേക റിക്രൂട്ട്മെന്റ് നടപടികളുടെ ഭാഗമായി 1538 ജൂനിയര് അസോസിയേറ്റ് (കസ്റ്റമര് സപ്പോര്ട്ട് & സെയില്സ്) തസ്തികകളിലേക്ക് അപേക്ഷ ക്ഷണിച്ചു. യോഗ്യരായ ഉദ്യോഗാര്ത്ഥികള്ക്ക് ഓഗസ്റ്റ് 27 വരെ എസ്ബിഐയുടെ ഔദ്യോഗിക കരിയര് പോര്ട്ടല് വഴി അപേക്ഷ സമര്പ്പിക്കാം. എസ്സി, എസ്ടി, ഒബിസി വിഭാഗങ്ങളിലെ ബാക്ക്ലോഗ് ഒഴിവുകളിലേക്കാണ് ഈ റിക്രൂട്ട്മെന്റ് നടത്തുന്നത്.
ഉദ്യോഗാര്ത്ഥികള്ക്ക് ഏതെങ്കിലും ഒരു സംസ്ഥാനത്തോ കേന്ദ്രഭരണപ്രദേശത്തോ ഉള്ള ഒഴിവുകളിലേക്ക് മാത്രമേ അപേക്ഷിക്കാന് കഴിയൂ. ഈ റിക്രൂട്ട്മെന്റ് നടപടിയില് ഒരു തവണ മാത്രമേ പരീക്ഷ എഴുതാന് അനുവദിക്കൂ. അപേക്ഷയില് തിരഞ്ഞെടുക്കുന്ന സംസ്ഥാനത്തിനോ കേന്ദ്രഭരണപ്രദേശത്തിനോ ബാധകമായ പ്രാദേശിക ഭാഷാ യോഗ്യതയും ഉദ്യോഗാര്ത്ഥികള് നേടിയിരിക്കണം.
അംഗീകൃത സര്വകലാശാലയില് നിന്നുള്ള ഏതെങ്കിലും വിഷയത്തിലുള്ള ബിരുദമോ അല്ലെങ്കില് കേന്ദ്ര സര്ക്കാര് അംഗീകരിച്ച തത്തുല്യ യോഗ്യതയോ ഉദ്യോഗാര്ത്ഥികള്ക്ക് ഉണ്ടായിരിക്കണം. 2026 ഏപ്രില് 1-ലെ കണക്കനുസരിച്ച്, അപേക്ഷകര്ക്ക് കുറഞ്ഞത് 20 വയസ്സും പരമാവധി 28 വയസ്സും ഉണ്ടായിരിക്കണം. അതായത് 1998 ഏപ്രില് 2-നും 2006 ഏപ്രില് 1-നും ഇടയില് (ഈ തീയതികള് ഉള്പ്പെടെ) ജനിച്ചവരായിരിക്കണം ഉദ്യോഗാര്ത്ഥികള്.
അര്ഹരായ സംവരണ വിഭാഗക്കാര്ക്ക് പ്രായപരിധിയില് ഇളവ് ലഭിക്കുന്നതാണ്. പ്രാഥമിക പരീക്ഷ, പ്രധാന പരീക്ഷ, പ്രാദേശിക ഭാഷാ പ്രാവീണ്യ പരീക്ഷ എന്നിവ ഉള്പ്പെടുന്നതാണ് തിരഞ്ഞെടുപ്പ് പ്രക്രിയ. 100 മാര്ക്കിനുള്ള പ്രാഥമിക പരീക്ഷയില് ഒബ്ജക്റ്റീവ് മാതൃകയിലുള്ള ചോദ്യങ്ങളാണുണ്ടാവുക. ഇതിനായി ഒരു മണിക്കൂര് സമയമാണ് അനുവദിച്ചിരിക്കുന്നത്.
തെറ്റായ ഉത്തരങ്ങള്ക്ക് നെഗറ്റീവ് മാര്ക്കിംഗ് ഉണ്ടായിരിക്കും. ഓരോ വിഭാഗത്തിലോ മൊത്തത്തിലുള്ള പ്രാഥമിക പരീക്ഷയിലോ മിനിമം യോഗ്യതാ മാര്ക്ക് നിശ്ചയിച്ചിട്ടില്ലെന്നും, വിഭാഗം തിരിച്ചുള്ള മാര്ക്ക് കണക്കാക്കില്ലെന്നും വിജ്ഞാപനത്തില് വ്യക്തമാക്കിയിട്ടുണ്ട്. നിയമനത്തിന് യോഗ്യത നേടുകയും എന്നാല് പത്താം ക്ലാസിലോ പന്ത്രണ്ടാം ക്ലാസിലോ നിര്ദ്ദിഷ്ട പ്രാദേശിക ഭാഷ പഠിച്ചിട്ടില്ലാത്തവരുമായ ഉദ്യോഗാര്ത്ഥികള് എല്എല്പിടിക്ക് ഹാജരാകേണ്ടതുണ്ട്.
ബന്ധപ്പെട്ട പ്രാദേശിക ഭാഷയിലുള്ള വായന, എഴുത്ത്, സംസാരം, ഭാഷാ ഗ്രഹണ ശേഷി എന്നിവ ഈ പരീക്ഷയിലൂടെ വിലയിരുത്തും. ഉദ്യോഗാര്ത്ഥികള് എസ്ബിഐ കരിയേഴ്സിന്റെ ഔദ്യോഗിക വെബ്സൈറ്റ് വഴിയാണ് അപേക്ഷ സമര്പ്പിക്കേണ്ടത്. ഉദ്യോഗാര്ത്ഥികള് റിക്രൂട്ട്മെന്റ് പ്രക്രിയയിലുടനീളം അവരുടെ രജിസ്റ്റര് ചെയ്ത ഇമെയില് ഐഡിയും മൊബൈല് നമ്പറും സജീവമായി സൂക്ഷിക്കണം.
പരീക്ഷകള്ക്ക് കണ്ണൂര്, കോഴിക്കോട്, മലപ്പുറം, പാലക്കാട്, തൃശൂര്, എറണാകുളം, ആലപ്പുഴ, കോട്ടയം, കൊല്ലം, തിരുവനന്തപുരം എന്നിവിടങ്ങളില് കേന്ദ്രങ്ങള് ഉണ്ട്. മംഗളൂരു, ഉഡുപ്പി, മൈസൂരു, ബെംഗളൂരു, കോയമ്പത്തൂര്, നാഗര്കോവില്/ കന്യാകുമാരി തിരുനല്വേലി, സേലം, കവരത്തി തുടങ്ങിയ സ്ഥലങ്ങളിലും പരീക്ഷ എഴുതാം. 750 രൂപയാണ് അപേക്ഷഫീസ്. എസ്സി, എസ്ടി വിഭാഗക്കാര്ക്കും ഭിന്നശേഷി വിഭാഗക്കാര്ക്കും വിമുക്തഭടന്മാര്ക്കും ഫീസ് ഇല്ല.
അപേക്ഷിക്കുന്നതിന് : https://sbi.bank.in/web/careers/current-openings സന്ദര്ശിക്കുക.
ഇ മെയില്: [email protected]
ഹെല്പ്പ് ഡെസ്ക്: http://cgrs.ibps.in ഫോണ്: 022/22820427 (രാവിലെ 11 മുതല് വൈകിട്ട് 5 മണി വരെ ബാങ്ക് പ്രവൃത്തി ദിവസങ്ങളില്).