യുഎഇയിലെ എണ്ണവില സെപ്റ്റംബറിൽ ഉയരുമോ? ഹോർമുസ് കടലിടുക്കിലെ അനിശ്ചിതത്വം സ്വാധീനിക്കും | Will Fuel Prices In The UAE Rise In September? Uncertainty In The Strait Of Hormuz Will Be A Factor

Gulf

oi-Nidhin Illikkambath

Published: Tuesday, August 25, 2026, 19:01 [IST]

ദുബായ്: ആഗോള എണ്ണവില ഉയർന്ന നിലയിൽ തുടരുന്നതിനാൽ യുഎഇയിൽ സെപ്റ്റംബർ മാസത്തെ പെട്രോൾ, ഡീസൽ വിലയിൽ നേരിയ വർധനയ്ക്ക് സാധ്യതയെന്ന് റിപ്പോർട്ട്. സെപ്റ്റംബർ മാസത്തേക്കുള്ള പുതുക്കിയ ഇന്ധനവില അടുത്ത ആഴ്‌ച പ്രഖ്യാപിക്കും. മിഡിൽ ഈസ്‌റ്റിലെ യുദ്ധ സാഹചര്യവും യുഎസ്-ഇറാൻ സംഘർഷവും ഹോർമുസ് കടലിടുക്കിലൂടെയുള്ള എണ്ണക്കപ്പൽ ഗതാഗതത്തിലെ തടസങ്ങളും കാരണം ആഗോള എണ്ണവില ഉയരാൻ കാരണമാകുന്നുണ്ട്.

ഓഗസ്‌റ്റിൽ ബ്രെന്റ് ക്രൂഡിന്റെ ശരാശരി ക്ലോസിങ് വില ബാരലിന് ഏകദേശം 87.70 ഡോളറായിരുന്നു. ജൂലൈയിൽ ഇത് 83.46 ഡോളറായിരുന്നു. ഓഗസ്‌റ്റിലെ ആദ്യ മൂന്നര ആഴ്‌ചകളിൽ ബ്രെന്റ് വില ബാരലിന് 80 മുതൽ 90 ഡോളർ വരെയുള്ള നിരക്കിലാണ് പ്രധാനമായും വ്യാപാരം നടത്തിയത്. ആഗോള ക്രൂഡ് ഓയിൽ വില ഉയർന്നതിനെ തുടർന്ന് ഓഗസ്‌റ്റ് മാസത്തിൽ യുഎഇ പെട്രോൾ വിലയിൽ ലിറ്ററിന് ഏകദേശം 0.20 ദിർഹത്തിന്റെ വർധന വരുത്തിയിരുന്നു.

നിലവിൽ സൂപ്പർ 98 പെട്രോളിന് ലിറ്ററിന് 3.60 ദിർഹം, സ്പെഷ്യൽ 95ന് 3.49 ദിർഹം, ഇ-പ്ലസിന് 3.41 ദിർഹം എന്നിങ്ങനെയാണ് വില. ഇന്ന് രാവിലെ ബ്രെന്റ് ക്രൂഡ് ബാരലിന് 91.18 ഡോളറിലും, ഡബ്ള്യു ടി ഐ ക്രൂഡ് 84.13 ഡോളറിലുമാണ് വ്യാപാരം നടത്തിയത്. സാധാരണ ആവശ്യകതയിലെ കുറവിനേക്കാൾ എണ്ണയുടെ ഭൗതിക ലഭ്യതയുമായി ബന്ധപ്പെട്ട അനിശ്ചിതത്വമാണ് നിലവിൽ വിലയെ സ്വാധീനിക്കുന്ന പ്രധാന ഘടകം എന്നാണ് വിദഗ്‌ധർ പറയുന്നത്.

അതിനിടെ സാഹചര്യം കൂടുതൽ ആശങ്ക ഉണർത്തുന്നത് ആക്കി ഹോർമുസ് കടലിടുക്കിലൂടെയുള്ള ടാങ്കർ ഗതാഗതം ഇപ്പോഴും വലിയ തോതിൽ തടസപ്പെട്ടിരിക്കുകയാണ്. ഇറാന്റെ എണ്ണ കയറ്റുമതി, പ്രാദേശിക കപ്പൽ ഗതാഗതം, റിഫൈനറികളിലേക്കുള്ള ലഭ്യത എന്നിവയെ ബാധിക്കുന്ന ഏത് സംഭവവും എണ്ണവിപണിയിൽ വലിയ ചലനമുണ്ടാക്കാൻ സാധ്യതയുണ്ട്.

അമേരിക്കൻ പ്രസിഡന്റ് ഡൊണാൾഡ് ട്രംപ് ഇറാനെതിരെ പുതിയ ഉപരോധങ്ങൾ പ്രഖ്യാപിക്കുകയും ടെഹ്റാനുമായി സഹകരിക്കുന്ന രാജ്യങ്ങളുമായുള്ള സാമ്പത്തിക ബന്ധങ്ങൾ വിച്ഛേദിക്കുമെന്ന മുന്നറിയിപ്പ് നൽകുകയും ചെയ്‌തിട്ടുണ്ട്. കടുത്ത ഉപരോധങ്ങൾ ഇറാന്റെ എണ്ണ കയറ്റുമതി കുറയ്ക്കുകയോ കപ്പൽ ഗതാഗതത്തിലെ തടസങ്ങൾ വർധിപ്പിക്കുകയോ ചെയ്‌താൽ ബ്രെന്റ് വില 90 ഡോളറിന് മുകളിൽ തുടരാൻ സാധ്യതയുണ്ടെന്നാണ് വിലയിരുത്തൽ.

എങ്കിലും നയതന്ത്ര സാഹചര്യങ്ങൾ മെച്ചപ്പെടുകയും ടാങ്കർ ഗതാഗതം സാധാരണ നിലയിലേക്ക് മടങ്ങുകയും ചെയ്‌താൽ നിലവിലെ അധിക വിലയിൽ കുറവുണ്ടാകാനും സാധ്യതയുണ്ട്. എണ്ണയുടെ ഒഴുക്ക് ഇപ്പോഴും സാധാരണ നിലയേക്കാൾ വളരെ താഴെയാണ്. ഹോർമുസ് കടലിടുക്കിലെ സംഘർഷവും ഇറാനും അതിന്റെ വ്യാപാര പങ്കാളികൾക്കുമെതിരായ യുഎസ് ഉപരോധങ്ങളും വിതരണ ആശങ്കകൾ നിലനിർത്തുന്ന സാഹചര്യത്തിൽ സെപ്റ്റംബറിൽ വില ഉയരാൻ തന്നെയാണ് സാധ്യത എന്നാണ് വിലയിരുത്തൽ.