ഈ വർഷത്തെ ഐപിഎല്ലിൽ സഞ്ജു നേടുന്ന രണ്ടാമത്തെ സെഞ്ചുറിയാണിത്. ഐപിഎൽ ചരിത്രത്തിൽ സഞ്ജുവിന്റെ അഞ്ചാം സെഞ്ചുറിയും.

വിക്കറ്റ് കീപ്പർ ബാറ്റർ എന്ന നിലയിൽ ടി20യിൽ സഞ്ജു നേടുന്ന ആറാമത്തെ സെഞ്ചുറിയാണിത്. ഇതോടെ ടി20യിൽ ഏറ്റവും കൂടുതൽ സെഞ്ചുറികൾ നേടുന്ന ഇന്ത്യൻ വിക്കറ്റ് കീപ്പർ ബാറ്റർമാരുടെ പട്ടികയിൽ സഞ്ജു ഒന്നാമതെത്തി. ഐപിഎൽ 2026 ലേലത്തിന് മുന്നോടിയായി ട്രേഡ് ഡീലിലൂടെ രാജസ്ഥാൻ റോയൽസിൽ നിന്നും ചെന്നൈ സൂപ്പർ കിംഗ്‌സിലെത്തിയ സഞ്ജു, വിക്കറ്റ് കീപ്പറായി കളിച്ച 235 ടി20കളിൽ നിന്നാണ് ഈ ആറ് സെഞ്ചുറികൾ സ്വന്തമാക്കിയത്.

150 മത്സരങ്ങളിൽ നിന്ന് അഞ്ച് സെഞ്ചുറികൾ നേടിയ ഇഷാൻ കിഷനാണ് പട്ടികയിൽ രണ്ടാമത്.

ലോക ടി20 ക്രിക്കറ്റിൽ ക്വിന്റൺ ഡി കോക്ക് മാത്രമാണ് വിക്കറ്റ് കീപ്പർ ബാറ്റർ എന്ന നിലയിൽ സഞ്ജുവിനേക്കാൾ കൂടുതൽ സെഞ്ചുറികൾ നേടിയിട്ടുള്ളത്. നിലവിൽ നടന്നുകൊണ്ടിരിക്കുന്ന മത്സരത്തിൽ മുംബൈ ഇന്ത്യൻസിനായി കളിക്കുന്ന ഡി കോക്ക് 397 ടി20 മത്സരങ്ങളിൽ നിന്നായി 9 സെഞ്ചുറികൾ നേടിയിട്ടുണ്ട്.

ഐപിഎല്ലിൽ മാത്രം വിക്കറ്റ് കീപ്പർ എന്ന നിലയിൽ സഞ്ജുവിന് ഇപ്പോൾ മൂന്ന് സെഞ്ചുറികളുണ്ട് (ആകെ 122 മത്സരങ്ങൾ). ഇത്രതന്നെ ഐപിഎൽ സെഞ്ചുറികളാണ് ഡി കോക്കിന്റെയും (102 മത്സരങ്ങൾ) പേരിലുള്ളത്.