Technology
oi-Aromal R
ഐഫോൺ ഉൾപ്പെടെയുള്ള ആപ്പിൾ ഉൽപ്പന്നങ്ങൾ വാങ്ങാൻ ആഗ്രഹിക്കുന്നവർക്ക് ഒരു നിരാശവാർത്ത. ആപ്പിളിന്റെ എല്ലാ ഉൽപ്പന്നങ്ങൾക്കും വരും ദിവസങ്ങളിൽ വില കുത്തനെ കൂടാൻ പോകുന്നു എന്ന നിർണായക വിവരമാണ് ഇപ്പോൾ പുറത്തുവരുന്നത്. മെമ്മറി, സ്റ്റോറേജ് ചിപ്പുകളുടെ വില കുത്തനെ ഉയർന്നതോടെ ഉൽപ്പന്നങ്ങളുടെ വില കൂട്ടാതെ കമ്പനിക്ക് മുന്നോട്ട് പോകാൻ കഴിയില്ലെന്ന് ആപ്പിൾ സിഇഒ ടിം കുക്ക് ഔദ്യോഗികമായി സ്ഥിരീകരിച്ചു. അന്താരാഷ്ട്ര മാധ്യമങ്ങൾക്ക് നൽകിയ അഭിമുഖത്തിലാണ് അദ്ദേഹം ഇക്കാര്യം വ്യക്തമാക്കിയത്.
ഈ വർഷം സെപ്റ്റംബറിൽ ആപ്പിളിന്റെ സിഇഒ സ്ഥാനം ഒഴിഞ്ഞ് ജോൺ ടെർനസിന് ചുമതല കൈമാറാൻ ഇരിക്കെയാണ് ടിം കുക്കിന്റെ ഈ സുപ്രധാന പ്രഖ്യാപനം. നിലവിലെ സാഹചര്യത്തിൽ വിലവർദ്ധനവ് ഒഴിവാക്കാൻ കഴിയില്ലെന്ന് അദ്ദേഹം പറഞ്ഞു.
എന്തുകൊണ്ടാണ് പെട്ടെന്ന് വില കൂടുന്നത്?
ആൻഡ്രോയിഡ് ഫോണുകളെ നേരത്തെ തന്നെ ബാധിച്ച ഡിറാം (DRAM) സപ്ലൈ പ്രതിസന്ധിയാണ് ഇപ്പോൾ ആപ്പിളിനെയും പിടികൂടിയിരിക്കുന്നത്. ആഗോളതലത്തിൽ ആർട്ടിഫിഷ്യൽ ഇന്റലിജൻസ് സാങ്കേതികവിദ്യയുടെ ഉപയോഗം വലിയ രീതിയിൽ വർദ്ധിച്ചതാണ് ഇതിന് പ്രധാന കാരണം. എഐ സെർവറുകൾക്കും ഡാറ്റാ സെന്ററുകൾക്കും ആവശ്യമായ ഉയർന്ന ശേഷിയുള്ള മെമ്മറി ചിപ്പുകൾ നിർമ്മിക്കാനാണ് കമ്പനികൾ ഇപ്പോൾ കൂടുതൽ മുൻഗണന നൽകുന്നത്. ഇതോടെ സ്മാർട്ട്ഫോണുകൾ പോലുള്ള സാധാരണ ഇലക്ട്രോണിക്സ് ഉപകരണങ്ങൾക്ക് ആവശ്യമായ മെമ്മറി ചിപ്പുകളുടെ ലഭ്യത കുറയുകയും അവയുടെ വില കുത്തനെ ഉയരുകയും ചെയ്തു.
“വില കൂട്ടുക എന്നത് ഇപ്പോൾ ഞങ്ങൾക്ക് മുന്നിൽ മറ്റ് വഴികളില്ലാത്ത സാഹചര്യമാണ്. കമ്പനിക്ക് മേൽ വരുന്ന ഈ അധിക ബാധ്യത ഉപഭോക്താക്കളിലേക്ക് എത്താതിരിക്കാൻ ഞങ്ങൾ പരമാവധി ശ്രമിച്ചിരുന്നു. എന്നാൽ ഇപ്പോൾ കാര്യങ്ങൾ കൈവിട്ട അവസ്ഥയിലാണ്,” ടിം കുക്ക് വ്യക്തമാക്കി.
ഏതൊക്കെ ഉൽപ്പന്നങ്ങളെ ബാധിക്കും? എത്ര രൂപ കൂടും?
വില എപ്പോഴാണ് കൂടുകയെന്നോ എത്ര ശതമാനം വർദ്ധനവ് ഉണ്ടാകുമെന്നോ ടിം കുക്ക് കൃത്യമായി വെളിപ്പെടുത്തിയിട്ടില്ല. എങ്കിലും ഐഫോൺ, ഐപാഡ്, മാക്ബുക്ക് തുടങ്ങിയ പ്രധാന ഉൽപ്പന്നങ്ങളെയെല്ലാം ഈ വിലവർദ്ധനവ് ബാധിക്കുമെന്നാണ് സൂചന. മെമ്മറി ചിപ്പുകളുടെ വിലയും ലഭ്യതയും സാധാരണ നിലയിലാകേണ്ടത് കൺസ്യൂമർ ഉൽപ്പന്നങ്ങൾക്ക് അത്യാവശ്യമാണെന്നും അദ്ദേഹം കൂട്ടിച്ചേർത്തു.
സ്വന്തമായി മെമ്മറി ചീപ്പ് നിർമ്മാണ ഫാക്ടറികൾ തുടങ്ങാൻ ആപ്പിളിന് പ്ലാനില്ല. എന്നാൽ നിലവിലെ ചിപ്പ് പ്രതിസന്ധി പരിഹരിക്കാൻ കമ്പനിയുടെ പക്കലുള്ള സാമ്പത്തിക കരുതൽ ശേഖരം ഉപയോഗിക്കാൻ ആപ്പിൾ തയ്യാറാണെന്ന സൂചനയും സിഇഒ നൽകിയിട്ടുണ്ട്. സെപ്റ്റംബറിൽ പുതിയ ഐഫോൺ മോഡലുകൾ വിപണിയിൽ എത്താനിരിക്കെ, നിലവിലുള്ള മോഡലുകൾക്കും വരാനിരിക്കുന്നവയ്ക്കും വില കൂടുമെന്ന വാർത്ത ആപ്പിൾ പ്രേമികളെ തെല്ലൊന്നുമല്ല നിരാശരാക്കുന്നത്.