സമൂഹമാധ്യമങ്ങളിൽ പങ്കുവെച്ച ഒരു ബിഹൈൻഡ് ദി സീൻ വീഡിയോയിലൂടെയാണ് സനോബർ ഈ അനുഭവം വീണ്ടും ഓർമിച്ചത്. ചിത്രത്തിലെ പ്രധാന ക്ലിഫ് ജമ്പ് രംഗം ചിത്രീകരിക്കുന്നതിനിടെയാണ് അപ്രതീക്ഷിതമായ സാങ്കേതിക പ്രശ്നത്തെ തുടർന്ന് അപകടസാഹചര്യം ഉണ്ടായതെന്ന് അവർ പറഞ്ഞു.
ഐശ്വര്യ റായ് ബച്ചനുവേണ്ടി സ്റ്റണ്ട് ഡബിൾ ആയി പ്രവർത്തിച്ച സനോബർ, ചിത്രീകരണത്തിനിടെ നേരിട്ട ആ നിർണായക നിമിഷങ്ങളും സംഘത്തിന്റെ ഇടപെടലുകളുമാണ് വീഡിയോയിലൂടെ പങ്കുവെച്ചത്.
‘രാവൺ’ സിനിമയുടെ ക്ലൈമാക്സ് രംഗത്തിനായി ചിത്രീകരിച്ച ക്ലിഫ് ജമ്പ് സീക്വൻസിനിടെ നേരിട്ട അപകടസാഹചര്യം സ്റ്റണ്ട് പെർഫോമർ സനോബർ പർദിവാല വിശദീകരിച്ചു. ചിത്രത്തിൽ ഐശ്വര്യ റായ് ബച്ചൻ അവതരിപ്പിച്ച രാഗിണി എന്ന കഥാപാത്രം ഭർത്താവ് ദേവ് വീരയെ കൊല്ലാതിരിക്കാൻ ഉയർന്ന പാറക്കെട്ടിൽ നിന്ന് മലയിടുക്കിലേക്ക് ചാടുന്ന രംഗത്തിനിടെയാണ് അപ്രതീക്ഷിതമായ സാങ്കേതിക പ്രശ്നം ഉണ്ടായതെന്ന് സനോബർ വ്യക്തമാക്കി.
സ്ക്രീനിൽ അനായാസമായി തോന്നുന്ന ഈ രംഗത്തിന് പിന്നിൽ ഏറെ വെല്ലുവിളികൾ ഉണ്ടായിരുന്നുവെന്നും, സ്റ്റണ്ട് ചിത്രീകരണത്തിനിടെ ഉണ്ടായ സങ്കീർണതയെ തുടർന്ന് താൻ പാറക്കെട്ടിന്റെ മധ്യഭാഗത്ത് ഏകദേശം 30 മിനിറ്റോളം തൂങ്ങിക്കിടക്കേണ്ടി വന്നതായും അവർ സമൂഹമാധ്യമത്തിലൂടെ പങ്കുവെച്ചു.
ഇൻസ്റ്റഗ്രാമിൽ പങ്കുവെച്ച കുറിപ്പിൽ സനോബർ പറഞ്ഞു: “150 അടി ഉയരം. 3.5 സെക്കൻഡ് ദൈർഘ്യം. ഒരിക്കലും മറക്കാനാകാത്ത ഒരു സ്റ്റണ്ട്. ‘രാവൺ’ ചിത്രത്തിലെ ഈ ക്ലിഫ് ജമ്പിനിടെ അപ്രതീക്ഷിതമായ സങ്കീർണത കാരണം പാറക്കെട്ടിന്റെ മധ്യത്തിൽ ഏകദേശം 30 മിനിറ്റോളം ഞാൻ കുടുങ്ങിക്കിടന്നു.”
സ്റ്റണ്ട് രംഗങ്ങളുടെ പിന്നിലെ വെല്ലുവിളികളിൽ, ആസൂത്രണം ചെയ്തതുപോലെ കാര്യങ്ങൾ നടക്കാത്ത സാഹചര്യങ്ങളെ നേരിടുന്നതും പ്രധാനമാണെന്ന് സനോബർ പറഞ്ഞു.
“സ്റ്റണ്ട് ജോലിയിൽ തയ്യാറെടുപ്പ് എന്നത് രംഗം കൃത്യമായി നടപ്പാക്കുന്നതിൽ മാത്രം ഒതുങ്ങുന്നില്ല. അപ്രതീക്ഷിതമായ സാഹചര്യങ്ങൾ ഉണ്ടാകുമ്പോൾ അതിനെ എങ്ങനെ നേരിടുന്നു എന്നതും നിർണായകമാണ്. ശാന്തത പാലിക്കുക, ശ്വാസം നിയന്ത്രിക്കുക, സുരക്ഷാ സംവിധാനങ്ങളിൽ വിശ്വാസം പുലർത്തുക, ഊർജം സംരക്ഷിക്കുക എന്നിവയാണ് അത്തരം സാഹചര്യങ്ങളിൽ പ്രധാനമെന്ന്” അവർ കുറിച്ചു.
വെള്ളച്ചാട്ടത്തിന് സമീപം പാറക്കെട്ടിൽ തൂങ്ങിക്കിടന്ന സമയത്ത് ശാന്തത പാലിക്കാനാണ് ശ്രമിച്ചതെന്ന് അപകടം നിറഞ്ഞ നിമിഷങ്ങളെ ഓർത്തെടുത്ത് സനോബർ പർദിവാല പറഞ്ഞു. “ആ സമയത്ത് ഞാൻ ചെയ്തത് അതായിരുന്നു. വെള്ളച്ചാട്ടത്തിന് സമീപം തൂങ്ങിക്കിടന്ന്, നിയന്ത്രിതമായി ശ്വാസമെടുത്ത്, പൂർണമായും ശാന്തത പാലിച്ചു. വളരെ കുറച്ച് ആളുകൾക്ക് മാത്രം കാണാൻ കഴിയുന്ന ഒരു കാഴ്ചപ്പാടിൽ നിന്നായിരുന്നു ആ നിമിഷങ്ങളെ ഞാൻ അനുഭവിച്ചത്,” സനോബർ കുറിച്ചു.
അപ്രതീക്ഷിതമായ സങ്കീർണതകൾക്കിടയിലും ആത്മസംയമനം കൈവിടാതിരുന്നതാണ് ആ സാഹചര്യം മറികടക്കാൻ സഹായിച്ചതെന്നും സ്റ്റണ്ട് പെർഫോമർ വ്യക്തമാക്കി. പിന്നീട് ആ സ്റ്റണ്ട് രംഗം ശ്രദ്ധ നേടുകയും ടോറസ് വേൾഡ് സ്റ്റണ്ട് അവാർഡ്സിൽ നാമനിർദ്ദേശം ലഭിക്കുകയും ചെയ്തു.
“ചില സ്റ്റണ്ടുകൾ ശരീരത്തെ പരീക്ഷിക്കും. ചിലത് മനസ്സിനെയും. ഈ സ്റ്റണ്ട് രണ്ടിനെയും ഒരുപോലെ പരീക്ഷിച്ചു,” എന്നായിരുന്നു ഈ അനുഭവത്തെക്കുറിച്ച് സനോബർ പറഞ്ഞത്.
മണിരത്നം സംവിധാനം ചെയ്ത ‘രാവൺ’ എന്ന ചിത്രത്തിൽ ഐശ്വര്യ റായ് ബച്ചൻ, അഭിഷേക് ബച്ചൻ, വിക്രം, പ്രിയാമണി, രവി കിഷൻ എന്നിവരാണ് പ്രധാന വേഷങ്ങളിൽ അഭിനയിച്ചത്. എ.ആർ. റഹ്മാനാണ് ചിത്രത്തിന് സംഗീതം ഒരുക്കിയത്.
ഹിന്ദിയിലും തമിഴിലും ഒരേസമയം ചിത്രീകരിച്ച ‘രാവൺ’ എന്ന സിനിമയുടെ രണ്ട് പതിപ്പുകളിലും വിക്രം അഭിനയിച്ചിരുന്നു. ഹിന്ദി പതിപ്പിൽ അഭിഷേക് ബച്ചൻ അവതരിപ്പിച്ച കഥാപാത്രത്തെ തമിഴ് പതിപ്പിൽ പൃഥ്വിരാജ് സുകുമാരനാണ് അവതരിപ്പിച്ചത്.
