നായകൻ മുഖ്യമന്ത്രിയാണ്; ‘ജനനായകൻ’ ടിക്കറ്റ് വിൽപ്പനയിൽ അതീവ ശ്രദ്ധ ചെലുത്താൻ വിജയ് | സിനിമാ വാർത്ത

ചിത്രത്തിന്റെ ടിക്കറ്റ് വിലനിർണയത്തിലും വിൽപ്പന നടപടികളിലും അതീവ ജാഗ്രത പാലിക്കണമെന്ന് വിജയ് അണിയറപ്രവർത്തകർക്ക് നിർദേശം നൽകിയതായി ‘ഗൾട്ട്’ റിപ്പോർട്ട് ചെയ്യുന്നു. ടിക്കറ്റ് നിരക്കിനെ ചൊല്ലിയുള്ള ചെറിയ വിവാദങ്ങൾ പോലും അനാവശ്യ ശ്രദ്ധയാകർഷിക്കുകയും സിനിമയുടെ റിലീസിനെ ബാധിക്കുകയും ചെയ്യുമെന്ന ആശങ്കയാണ് ഇതിന് പിന്നിലെന്നും റിപ്പോർട്ടിൽ പറയുന്നു. അതിനാൽ, ഇക്കാര്യത്തിൽ കർശനമായ മാർഗനിർദേശങ്ങളാണ് വിജയ് നൽകിയിരിക്കുന്നതെന്നും റിപ്പോർട്ടിൽ വ്യക്തമാക്കുന്നു.

ടിക്കറ്റ് നിരക്ക് സർക്കാർ അനുവദിച്ച പരിധിക്കുള്ളിൽ തന്നെയെന്ന് ഉറപ്പാക്കാൻ ബന്ധപ്പെട്ട അധികൃതർ തിയേറ്ററുകളിൽ കർശന പരിശോധന നടത്താനിടയുണ്ടെന്നാണ് റിപ്പോർട്ടുകൾ. അനുവദനീയമായ നിരക്കിനെക്കാൾ കൂടുതൽ തുക ഈടാക്കുന്നതായി കണ്ടെത്തുന്ന തിയേറ്ററുകൾക്കെതിരെ കർശന നടപടി സ്വീകരിക്കാനും സാധ്യതയുണ്ടെന്നാണ് സൂചന.

വിജയ്‌യുടെ വൻ ആരാധകവൃന്ദവും ചിത്രങ്ങളുടെ റിലീസ് ദിനങ്ങളിലെ അസാധാരണമായ ടിക്കറ്റ് ആവശ്യകതയും മുൻനിർത്തിയാണ് ഇത്തരം മുൻകരുതലുകൾ സ്വീകരിക്കുന്നതെന്നാണ് റിപ്പോർട്ടുകൾ. വിജയ് ചിത്രങ്ങൾ റിലീസ് ചെയ്യുന്ന വേളയിൽ കരിഞ്ചന്തയും അമിത ടിക്കറ്റ് നിരക്കും സംബന്ധിച്ച പരാതികൾ പതിവായി ഉയരാറുണ്ട്.

എന്നാൽ ഇത്തവണ, രാഷ്ട്രീയ രംഗത്തെ സജീവ സാന്നിധ്യത്തിന്റെ പശ്ചാത്തലത്തിൽ സിനിമയുടെ റിലീസുമായി ബന്ധപ്പെട്ട എല്ലാ നടപടികളും സുതാര്യവും വിവാദരഹിതവുമാകണമെന്ന് വിജയ് ആഗ്രഹിക്കുന്നതായും, അതിനാലാണ് ടിക്കറ്റ് വിൽപ്പനയിലും വിലനിർണയത്തിലും പ്രത്യേക ശ്രദ്ധ ചെലുത്തുന്നതെന്നും റിപ്പോർട്ടുകൾ വ്യക്തമാക്കുന്നു.

സെൻസർ നടപടികളുമായി ബന്ധപ്പെട്ട പ്രശ്നങ്ങൾ ഉടൻ പരിഹരിക്കപ്പെടുമെന്നും, ജൂലൈയിൽ തന്നെ ചിത്രം റിലീസ് ചെയ്യാനുള്ള സാധ്യത അണിയറപ്രവർത്തകർ പരിശോധിക്കുന്നുണ്ടെന്നും സിനിമാ വൃത്തങ്ങൾ സൂചിപ്പിക്കുന്നു. എന്നാൽ, റിലീസ് തീയതി സംബന്ധിച്ച് ഇതുവരെ ഔദ്യോഗിക പ്രഖ്യാപനം ഉണ്ടായിട്ടില്ല.

എച്ച്. വിനോദ് സംവിധാനം ചെയ്യുന്ന ‘ജനനായകൻ’ വിജയ്, ബോബി ഡിയോൾ, പൂജ ഹെഗ്‌ഡെ, മമിത ബൈജു, പ്രകാശ് രാജ്, ഗൗതം വാസുദേവ് മേനോൻ എന്നിവരടങ്ങുന്ന വമ്പൻ താരനിരയാണ് അണിനിരക്കുന്നത്.