നായികയെ അമിതമായി ഗ്ലാമർവത്കരിച്ചു; വിമർശനങ്ങൾക്കിടെ മാറ്റങ്ങൾ വരുത്താനൊരുങ്ങി ‘പെദ്ധി’ സംവിധായകൻ | സിനിമാ വാർത്ത

സാമൂഹിക മാധ്യമമായ എക്‌സിൽ പങ്കുവെച്ച കുറിപ്പിലാണ് ബുച്ചി ബാബു സന നിലപാട് വ്യക്തമാക്കിയത്.

“ഒരു ചലച്ചിത്രകാരൻ എന്ന നിലയിൽ, സിനിമ പ്രേക്ഷകരെ ആകർഷിക്കുകയും പ്രചോദിപ്പിക്കുകയും അവരുടെ മനസ്സുമായി സംവദിക്കുകയും ചെയ്യേണ്ടതാണെന്നാണ് എന്റെ വിശ്വാസം. ഒരു വിഭാഗം ആളുകളെ അസ്വസ്ഥരാക്കുകയോ അവരോട് അനാദരവ് കാണിക്കുകയോ ചെയ്യുക എന്നത് ഒരിക്കലും സിനിമയുടെ ലക്ഷ്യമാകരുത്. ‘പെദ്ധി’യിലെ ചില രംഗങ്ങളെക്കുറിച്ച് ഉയർന്ന അഭിപ്രായങ്ങളും വിമർശനങ്ങളും ഞങ്ങൾ ശ്രദ്ധയിൽപ്പെടുത്തിയിട്ടുണ്ട്. അവയെ അതീവ ഗൗരവത്തോടെയാണ് കാണുന്നത്.

തിരശ്ശീലയ്ക്ക് മുന്നിലും പിന്നിലും സ്ത്രീകളോട് എപ്പോഴും വലിയ ആദരവാണ് ഞാൻ പുലർത്തിയിട്ടുള്ളത്. ഒരു സ്ത്രീ കഥാപാത്രത്തെയും വെറും കാഴ്ചവസ്തുവായി അവതരിപ്പിക്കുകയോ അവരോട് അനാദരവ് കാണിക്കുകയോ ചെയ്യുക എന്നത് ഞങ്ങളുടെ ഉദ്ദേശമായിരുന്നില്ല,” ബുച്ചി ബാബു സന കുറിച്ചു.

സിനിമയിലെ ഏതെങ്കിലും ഭാഗം അപ്രകാരമൊരു അനുഭവമോ അസ്വസ്ഥതയോ ഉണ്ടാക്കിയിട്ടുണ്ടെങ്കിൽ, ആ വികാരങ്ങളെ ഞങ്ങൾ ആദരവോടെ അംഗീകരിക്കുന്നു. ഉയരുന്ന ആശങ്കകൾ ഞങ്ങൾ മനസ്സിലാക്കുന്നു, അതിനോടൊപ്പം ആത്മാർത്ഥമായ ക്ഷമാപണവും അറിയിക്കുന്നു. ലഭിച്ച പ്രതികരണങ്ങൾ വിശദമായി വിലയിരുത്തിയതിന് ശേഷം ബന്ധപ്പെട്ട രംഗങ്ങളിൽ ആവശ്യമായ തിരുത്തലുകൾ വരുത്താൻ തീരുമാനിച്ചിട്ടുണ്ടെന്നും അദ്ദേഹം വ്യക്തമാക്കി.

പ്രേക്ഷകരുമായുള്ള ബന്ധത്തിലൂടെയാണ് സിനിമ വളരുന്നത്. അതിനാൽ, കഥാകൃത്തുക്കൾ എന്ന നിലയിൽ മാറിക്കൊണ്ടിരിക്കുന്ന സാമൂഹിക കാഴ്ചപ്പാടുകളെയും സംവേദനശീലങ്ങളെയും കുറിച്ച് ബോധവാന്മാരായിരിക്കേണ്ട ഉത്തരവാദിത്തം തങ്ങൾക്കുണ്ടെന്നും അദ്ദേഹം പറഞ്ഞു.