കളിയുടെ അന്തസ്സിന് നിരക്കാത്ത രീതിയിൽ പെരുമാറിയതിനാണ് 24 വയസ്സുകാരനായ ബാറ്റർക്കെതിരെ നടപടിയെടുത്തതെന്ന് വ്യാഴാഴ്ച പുറത്തിറക്കിയ ഔദ്യോഗിക പ്രസ്താവനയിൽ ബി.സി.സി.ഐ വ്യക്തമാക്കി. ഐ.പി.എൽ പെരുമാറ്റച്ചട്ടത്തിലെ ആർട്ടിക്കിൾ 2.21-ന്റെ ലംഘനമാണ് പരാഗ് നടത്തിയത്. മുല്ലൻപൂരിലെ ഡ്രസ്സിംഗ് റൂമിൽ വെച്ച് മത്സരത്തിന്റെ രണ്ടാം ഇന്നിംഗ്‌സിനിടെയായിരുന്നു ഈ സംഭവം. മാച്ച് റഫറി അമിത് ശർമ്മയാണ് ശിക്ഷാ നടപടികൾ സ്വീകരിച്ചത്.

ഐ.പി.എല്ലിന്റെ സൽപ്പേരിന് കളങ്കമുണ്ടാകാതിരിക്കാൻ ടീമിനും ഉദ്യോഗസ്ഥർക്കും ഉൾപ്പെട്ട കളിക്കാർക്കുമെതിരെ കൂടുതൽ കർശനമായ നടപടികൾ സ്വീകരിക്കുന്ന കാര്യം ആലോചിച്ചുവരികയാണെന്നും ബി.സി.സി.ഐ അറിയിച്ചു.

ഇന്ത്യയിൽ 2019 മുതൽ ഇ-സിഗരറ്റുകളുടെ ഉത്പാദനവും വിതരണവും വിൽപനയും പൂർണ്ണമായും നിരോധിച്ചിട്ടുള്ളതാണ്. നിരോധനം ലംഘിക്കുന്നവർക്ക് തടവുശിക്ഷയോ കനത്ത പിഴയോ ലഭിക്കാം. ആദ്യമായി കുറ്റം ചെയ്യുന്നവർക്ക് ഒരു വർഷം വരെ തടവോ ഒരു ലക്ഷം രൂപ വരെ പിഴയോ അല്ലെങ്കിൽ രണ്ടും കൂടിയോ ശിക്ഷയായി ലഭിക്കാൻ നിയമമുണ്ട്.

ഈ സീസണിൽ രാജസ്ഥാൻ റോയൽസിലെ ഒരു അംഗത്തിന് നേരെ ബി.സി.സി.ഐ നടപടിയെടുക്കുന്നത് ഇത് രണ്ടാം തവണയാണ്. നേരത്തെ, ടീം ഡഗൗട്ടിൽ ഇരുന്നു മൊബൈൽ ഉപയോഗിച്ചതിന് ടീം മാനേജർ റോമി ഭിന്ദറിന് ഒരു ലക്ഷം രൂപ പിഴ ചുമത്തിയിരുന്നു.